Охины сонин сайхан

Охин маань зуныхаа амралтаар Японы нэгэн сургуульд сурагч солилцооны хөтөлбөрт оролцон бараг 2 сар болоод ирлээ. 

Япон явах хүсэл нь дийлээд Япон хэл бие дааж 8 сар  орчим үзэж, үндэсний бүжгийн бэлтгэл хичээлийнхээ хажуугаар хийсээр, Япон сургуулийн хариуг яван явтлаа хүлээж, шийдвэр нь тулгамдуу гарсан тул сандруухан явсан юм.

Арван хоёр, арван гурван настай хүүхдийг гэрээс нь явуулахад санаа зовох зүйл байлгүй яахав. Ялангуяа, гэрээсээ зусланд явахыг эс хэлбэл гарч байгаагүй, хэл ус, зан заншил, цаг агаар нь эрс өөр газарт охин хүүхдээ явуулахдаа санаа зовж л байлаа. 

Ямар ч байсан маш амжилттай, сэтгэгдэл  өндөр буцаж ирсэнг хэлэх хэрэгтэй. 

Блогтоо оруулж болно гэж зөвшөөрсөн хоёр зургийг оруулж байна.

Ангийнх хүүхдүүдийн охинд минь дурсгасан дурсгал

Ангийнх нь бүх л хүүхдүүд охинтой минь хамт байх хугацаандаа төрсөн сэтгэгдлээ дурсгал дээрээ үлдээжээ. 

Хүүхдүүдийн бичсэн зүйлийг уншвал "Мисато бага сургуль таалагдсан уу? Биднийг, намайг битгий мартаарай, чиний бүжиг гоё байсан, дахиад ирээрэй, Японд ирсэнд баярлалаа, хөгжилтэй сайхан байлаа, миний нэрийг хамгийн анх цээжилсэнд баярлалаа, сайн найзууд болсондоо баяртай байна, хичээгээрэй, Монголд очоод биднийг дурсаж байгаарай, сайн сууж байгаарай, дараа дахин Японд ирээрэй" гэх мэтээр дор бүрнээ урам хайрласан, сэтгэгдэлийг асуусан халуун дулаан үгс бичжээ.

Охины яриагаар бол Японы бага сургууль их сайхан байсан гэнэ.

1. Багш нар нь ер уурладаггүй

2. Дуу хөгжмийн хичээл дээр лимбэ тоглохыг заасан гэнэ. Бүх хүүхдэд нэг нэг лимбэ тарааж, бүгд нотоо хараад зэрэг аялгуу тоглодог, тэр нь их таалагдсан байна.

3. Биеийн тамирын хичээл нь усанд сэлэлтийн хичээл ордог, энэ удаад усанд овоо сэлдэг болсон гэнэ.

4. Сургуулийн хоол амттай, бас их байдаг.

5. Сургууль нь маш том /төөрмөөр гэж хэлсэн/

6. Тооны хичээл нь амархан юм байна гэсэн. /Монгол сургуулийн бараг 4-р ангийн юм үздэг гэнэ/

За тэгээд Японд таалагдсан юм зөндөө гэнээ, олон олон амьтаны хүрээлэн, далайн амьтаны хүрээлэн, далай, завиар зугаалах, цэцэрлэгт хүрээлэн, бүгд л Монголд байдаггүй зүйлүүд тул хүүхэд их баярладаг юм байна. 

Японы халуун, өөрөө Япон хэл бага мэдэж байгаа нь хэцүү байсан гэнэ. 

Халуун бол яах ч аргагүй зүйл,  хэл бол сурвал хэцүү биш гэж ээж охин хоёр ойлголцсон гэж болно. Эхлээд огт ойлгогдохгүй байснаа аяндаа "аан ингэж хэлж байгаа юм байна" гэж таамагладаг болсон гэж байна лээ. 

Таамаглаж байгаад болох байлгүй дээ, ямар ч байсан нэг алхам урагш алхсан гэж би бодож байгаа.

Өө, нээрээ бассейн нь гадаа байдаг гэнэ, охин маань ч бассейнд их явсан болохоор бов бор болчихсон байсан шүү дээ. 

Өөр улсын хүүхдүүд ямар орчинд сурдаг болохыг зах зухаас үзэж чадсандаа охин маань баяртай байгаа билээ.